Bygdepride deler kvart år ut Bygdeprideprisen. Bygdeprideprisen vert delt ut til ein person eller organisasjon som på ein utmerka måte har gjort ein særskilt innsats for skeive personar si stilling i bygdesamfunnet.

Årets vinnar av Bygdeprideprisen er ein vegvisar for næringslivet. Verksemda har sjølv eigne klare og definerte mål for å arbeide for mindre ulikskap i samfunnet.

For oss i Bygdepride handlar det om å vise ei vilje og ei evne til å syne mangfald og inkludering. Prisvinnaren ikkje berre seier at dei skal gjere det, men viser det også.

Dette er ikkje sjølvsagt i ei tid der det internasjonalt vert hardare. For å kunne handle med USA, må einskilde verksemder, også i Noreg, bokstaveleg tala skrive under på at dei ikkje vil støtte arbeid for mellom andre skeive.

Årets prisvinnar har støtta frivillig arbeid i lokalsamfunna i årevis. Det gjeld også Bygdepride. Vi har fått økonomisk støtte frå denne aktøren sidan starten i 2018, og frå 2019 vart verksemda hovudsponsoren vår.

Men det er ikkje difor Sparebank 1 SMN Volda (tidlegare Søre Sunnmøre) får prisen. Prisen vert gjeven til denne verksemda fordi dei viser vilje og evne til å arbeide med inkludering og mangfald, både internt og eksternt. Sparebank 1 SMN Volda viser ei glede med å stille opp for oss, og den gleda smittar over på andre.

Bygdeprideprisen for 2025 går til Sparebank 1 SMN, avdeling Volda.